Mae’r gwanwyn yn gyfnod gwych i archwilio tirweddau gwyllt Cymru. Wrth i’r dyddiau dyfu’n hirach a bywyd gwyllt lenwi cefn gwlad, mae Tirweddau Dynodedig a Pharciau Cenedlaethol Cymru yn cynnig cyfleoedd anhygoel i weld bywyd gwyllt amrywiol. O adar ysglyfaethus prin i greaduriaid y môr, rydym yn eich gwahodd i ddarganfod rhai o’r lleoedd gorau i brofi bywyd gwyllt yn ei gynefin naturiol. Dyma ambell awgrym ar ble i fynd a beth i’w weld y gwanwyn hwn.
Awgrymiadau ar Wylio Bywyd Gwyllt dros y Gwanwyn
- Ymweld yn gynnar neu’n hwyr: Mae bywyd gwyllt ar eu mwyaf gweithredol gyda’r wawr ac wrth iddi nosi.
- Cofiwch eich sbienddrych: Bydd sbienddrych da yn eich helpu i weld adar a bywyd gwyllt arall o bell.
- Parchwch natur: Glynwch at lwybrau wedi’u marcio, osgoi amharu ar adar sy’n nythu, a dilynwch y Cod Cefn Gwlad i ddiogelu cynefinoedd gwerthfawr Cymru.
- Ymunwch â thaith dywysedig: Mae llawer o ardaloedd yn cynnig teithiau cerdded bywyd gwyllt gan arweinwyr gwybodus yn y gwanwyn.
Ynys Môn
Y gwanwyn yw’r amser perffaith i ymweld ag arfordir Ynys Môn, wrth i adar môr ddychwelyd i nythu ar glogwyni Gwarchodfa RSPB Ynys Lawd. Gwyliwch allan am balod, gwylogod, a llursod, a gwrandewch am eu sgrechfeydd sy’n llenwi’r awyr. Gellir gweld morloi llwyd yr Iwerydd yn aml yn ymlacio ar y creigiau, tra bod llamhidydd yr harbwr yn torri wyneb y tonnau o bryd i’w gilydd. Ar y tir, mae adar hirgoes fel cornchwiglod a pibyddion coesgoch i’w gweld yng ngwlyptiroedd Cors Ddyga, yn ogystal ag adar gwyllt fel corhwyaid a chwiwellod.
Bryniau Clwyd a Dyffryn Dyfrdwy
Mae Bryniau Clwyd a Dyffryn Dyfrdwy yn hafan i wylwyr adar. Mae Parc Gwledig Loggerheads, coetir dawel ar hyd Afon Alyn, yn le gwych i weld bronwennod y dŵr, gleision y dorlan, a hyd yn oed dyfrgwn yn y dyfroedd clir.
Pen Llŷn
Mae Pen Llŷn yn lleoliad gwych ar gyfer gweld bywyd gwyllt. Mae Porth Iago, traeth diarffordd ger Aberdaron, yn ddelfrydol ar gyfer gweld brain coesgoch a hebogiaid tramor yn esgyn uwchben y clogwyni. Mae Garn Boduan ger Nefyn yn cynnig golygfeydd godidog a dolydd sy’n llawn blodau gwyllt fel clychau’r gog a briallu. Mae gloÿnnod byw a pheillwyr hefyd i’w gweld yn yr ardal yn y gwanwyn.
Gŵyr
Mae arfordir Gŵyr yn drysorfa o fywyd gwyllt. Mae Bae Brychdyn, ger Llangennith, yn draeth heddychlon lle gellir gweld morloi llwyd yn arnofio yn y tonnau a bodaod y gwerni yn hela dros y twyni.
Dyffryn Gwy
Mae cân yr adar yn deffro coetiroedd hynafol Dyffryn Gwy yn y gwanwyn. Mae Coetiroedd Dyffryn Gwy Isaf, ger Tyndyrn, yn gartref i delorion y coed, brenhinoedd gwargyrch bronddu, a thingochion. Ar hyd glannau’r afon yn Llandogo, efallai y byddwch yn gweld dyfrgwn a gleision y dorlan, tra bod llawr y goedwig wedi’i orchuddio â garlleg gwyllt a chlychau’r gog. Mae’n lle heddychlon a gwerth chweil i’r rheiny sy’n mwynhau bywyd gwyllt i ymlacio.
Bannau Brycheiniog
Mae ucheldiroedd Bannau Brycheiniog yn lle gwych i weld bywyd gwyllt. Mae’r Mynyddoedd Du yn gartref i grugieir coch, gylfinir, ac ehedyddion, ac mae ei fryniau tonnog yn berffaith ar gyfer teithiau cerdded heddychlon. Beth am roi cynnig ar y dro hwn i gopa Crug Hywel o ganol y pentref?
Eryri
Mae mynyddoedd garw Eryri yn hafan i fywyd gwyllt gwydn. Mae Cwm Pennant, dyffryn diarffordd ger Beddgelert, yn gartref i eifr gwyllt, mwyachlod y mynydd, a chigfrain, ac mae ei lethrau isaf wedi’u carpedu â blodau gwyllt yn y gwanwyn. Mae Llwybr Cynwch ger Dolgellau yn opsiwn tawel arall, gan gynnig golygfeydd godidog o Aber Mawddach a chyfleoedd i weld tingochion a gwybedogion brith yn y coetiroedd derw.
Am brofiad tawel, i ffwrdd o bobl, ystyriwch Rhinog Fawr, rhan o’r Rhinogyd. Mae’r ardal anghysbell hon yn berffaith ar gyfer gweld brain coesgoch a hebogiaid tramor, ac mae ei thir creigiog yn frith o gennau a mwsoglau prin.
Pembrokeshire Coast
Mae arfordir Sir Benfro yn llawn bywyd gwyllt. Mae Penrhyn Marloes yn fan gwych ar gyfer nythu adar môr fel adar drycin y graig a gwylanod coesddu, ac mae ei byllau glan môr yn llawn bywyd morol. Mae ardal Pen-caer yn lleoliad ardderchog arall ar gyfer gweld llamhidyddion, dolffiniaid, a hyd yn oed morloi yn achlysurol.
Mae’r gwanwyn yn dymor o adnewyddu, ac nid oes lle gwell i’w brofi nag yn nhirweddau trawiadol Cymru. Mwynhewch ac archwiliwch yn ddiogel!