Mae Ffermio Bro yn gynllun gan Lywodraeth Cymru a ddechreuwyd ym mis Mai 2025. Mae’n cefnogi prosiectau ffermio ar hyd a lled Parciau Cenedlaethol a Thirweddau Cenedlaethol (Ardaloedd o Harddwch Naturiol Eithriadol/AHNEau gynt) Cymru sy’n gwneud gwelliannau i fyd natur a’r amgylchedd.

Yn 2025/26 (ei flwyddyn gyntaf) ariannodd y cynllun 84 o brosiectau ar draws 200 o ffermydd, gan blannu 83,000 o goed a chreu neu adfer 43km o wrychoedd. Mae cynefinoedd pwysig fel coetiroedd hynafol, ffridd, a choridorau glannau afonydd – a rhywogaethau eiconig, gan gynnwys y gylfinir, y wiber, y pathew a’r dyfrgi bellach wedi’u gwarchod yn well a hynny oherwydd ymrwymiad ffermwyr a’r timau Ffermio Bro sy’n gweithio ochr yn ochr â nhw.

Cliciwch yma i weld adroddiad blynyddiol Ffermio Bro 2025/26

‘Mae ein Parciau Cenedlathol a’n Tireweddau Cenedlaethol yn dirweddau byw a gweithredol sydd wedi’u cynnal dros genedlaethau drwy ffermio, diwylliant a chymuned. Mae gwarchod a gwella’r lleoedd hyn yn dibynnu ar weithio mewn partneriaeth â’r bobl sy’n eu hadnabod orau. Mae Ffermio Bro yn adlewyrchu ein hymrwymiad i’r dull hwnnw, gan ddod â ffermwyr, cymunedau ac arbenigedd lleol ynghyd i gyflawni prosiectau uchelgeisiol dan arweiniad lleol sydd ag effaith genedlaethol.’

Llyr Gruffydd AS, Y Gweinidog Cabinet dros Wydnwch Gwledig a Chynaliadwyedd

Sut mae Ffermio Bro yn gweithio

Mae Ffermio Bro yn cael ei reoli’n lleol gan y Tirweddau Dynodedig. Dylai ffermwyr a thirfeddianwyr ymgeisio’n uniongyrchol i gyrff Tirweddau Dynodedig, sydd wedi gosod y blaenoriaethau lleol ar gyfer y cynllun, a dyfarnu cyllid ar gyfer gweithgareddau sy’n adlewyrchu anghenion lleol. Nid oes angen i ffermwyr wneud cais drwy Daliadau Gwledig Cymru (RPW) am grantiau Ffermio Bro.

Mae gan bob un o’r Tirweddau gynghorwyr Ffermio Bro dynodedig, arbenigol sydd yn gweithio gyda ffermwyr a thirfeddianwyr i ddatblygu ceisiadau a chefnogi ymgeiswyr drwy’r broses. Cliciwch yma i weld manylion cyswllt y cynghorwyr.

Mae Ffermio Bro yn rhan o Haen Gydweithredol y CFfC, ac mae wedi’i integreiddio â darpariaeth ehangach y CFfC.

Edrych ymlaen

Gan adlewyrchu’r galw uchel gan ffermwyr, mae’r cynllun wedi cael dyraniad cyllid llawer uwch ar gyfer 2026 – 2028 gan Lywodraeth Cymru. Bydd hyn yn ein galluogi i ehangu’r ddarpariaeth, i gefnogi prosiectau tirwedd ar raddfa fwy ar draws llawer mwy o ffermydd – megis gwaith mawr ar y cyd i wella ansawdd dŵr ar draws dalgylchoedd afonydd cyfan.

Dros 2026-28, bydd Ffermio Bro yn cael dros £6.5m, gyda £2.72m y flwyddyn mewn cyllid cyfalaf ochr yn ochr â dyraniad refeniw sylweddol. Bydd y cyllid refeniw hwn yn galluogi Tirweddau Dynodedig i recriwtio staff ychwanegol, ymgymryd ag arolygon ecolegol hanfodol, cyflwyno hyfforddiant a chynnig cymorth cynghorol i ffermwyr.

Mae Ffermio Bro yn gynllun cydweithredol, ac rydym yn disgwyl y bydd bron pob prosiect a ariennir yn bartneriaeth rhwng nifer o ffermydd. Mae cynghorwyr lleol wrth law i helpu i greu a meithrin y cydweithrediadau hyn.

Er ein bod yn canolbwyntio’n bennaf ar natur, byddwn hefyd yn ariannu prosiectau sy’n gwella hawliau tramwy, yn ogystal â rhai sydd o fudd i nodweddion archaeolegol a henebion cofrestredig.

Nid oes terfynau amser cenedlaethol ar gyfer ymgeisio dan Ffermio Bro, ond efallai y bydd pob Parc Cenedlaethol neu Dirwedd Genedlaethol yn dewis gosod terfynau amser lleol. Cysylltwch â’ch cynghorydd Ffermio Bro i gael rhagor o wybodaeth.

Eisiau gwneud cais am gyllid Ffermio Bro? Cysylltwch â’ch Tirwedd Ddynodedig leol yn uniongyrchol. Cliciwch yma i weld manylion cyswllt cynghorydd Ffermio Bro eich Tirwedd Ddynodedig leol chi.