Mae prosiect tair blynedd uchelgeisiol Cysylltu’r Arfordir, sef prosiect i adfer byd natur a gefnogir gan gyllid Llywodraeth Cymru, ar fin dod i ben ac mae wedi cymryd camau breision i ddiogelu a gwella ecosystemau bregus Parc Cenedlaethol Arfordir Penfro.
Mae’r prosiect, sydd wedi’i lunio i ddiogelu cynefinoedd arfordirol a gwella bioamrywiaeth ar dir fferm wrth ymyl yr arfordir eiconig, yn gweithio mewn cydweithrediad agos â ffermwyr a thirfeddianwyr lleol i adfer cynefinoedd, cryfhau cadernid ecosystemau, a hyrwyddo ffyrdd cynaliadwy o reoli tir.
Mae Cysylltu’r Arfordir wedi esgor ar ganlyniadau trawiadol, gyda newidiadau o ran rheoli tir yn creu cynefinoedd ffyniannus ar gyfer bywyd gwyllt. Mae hyn wedi dod i’r amlwg wrth i ni weld blodau gwyllt arfordirol fel y ganrhi goch a’r clefryn yn ailymddangos lle mae mesurau pori er lles cadwraeth wedi’u rhoi ar waith, a phlanhigion âr prin fel trwyn-y-llo lleiaf a llysiau’r-gwrid yn tyfu yn yr ymylon o gwmpas cnydau sydd wedi cael eu gadael heb eu chwistrellu.
Drwy gydol y prosiect, mae Cysylltu’r Arfordir wedi cyflawni sawl carreg filltir arwyddocaol yn ei genhadaeth i adfer a gwarchod cynefinoedd. Mae’r rhain yn cynnwys gosod bron i 19,000 metr o ffensys i wella pori cadwraethol, a diogelu dros 80 hectar o lethrau arfordirol i warchod rhywogaethau arfordirol eiconig. Ar ben hynny, mae dros 50 hectar o weirgloddiau a 50 hectar o borfeydd parhaol sy’n gyforiog o rywogaethau wedi cael eu creu, gan wella bioamrywiaeth a chefnogi iechyd pridd.
Cefnogir y cynllun gan gyllid Tirweddau Cynaliadwy, Lleoedd Cynaliadwy, a weinyddir gan Lywodraeth Cymru a Thirweddau Cymru.